Irani thotë se i gjithë materiali i tij bërthamor ishte zhvendosur ‘në një vend të sigurt’ – përpara se raketat izraelite të godisnin centralet e tij bërthamore

Irani u mburr se i gjithë materiali i tij bërthamor ishte zhvendosur në “një vend të sigurt” përpara se raketat izraelite të godisnin centralet e tij bërthamore.

“Izraeli goditi Natanzin, Isfahanin, Khandabin dhe Arakun, por ato ishin evakuuar tashmë”, tha të enjten komandanti iranian Mohsen Rezaei, shkruan Daily Mail, përcjell Telegrafi.

“Të gjitha materialet janë zhvendosur në një vend të sigurt”, shtoi ai.

Izraeli ka nisur raketa drejt Iranit në një përpjekje për të dëmtuar aftësitë e tij bërthamore që nga e premtja e kaluar, dhe presidenti i SHBA-së, Donald Trump po mendonte të përfshihej.

Por, Trump “u tërhoq”, ndërsa vendet e fuqishme evropiane përgatiten të marrin pjesë në bisedimet e paqes me Iranin.

Në 48 orët e mëparshme, presidenti i SHBA-së kishte kërkuar “dorëzimin pa kushte” të Iranit dhe kishte kërcënuar me sulme ajrore “brenda disa ditësh”.

Lexo po ashtu Gjithçka që po ndodh në sulmet e Izraelit ndaj Iranit

Megjithatë, pasi kaloi pasditen i mbyllur në Dhomën e Situatave të Shtëpisë së Bardhë, të cilën ai e ka quajtur “Dhoma e Luftës”, ai tha se do t’i jepte Teheranit dy javë për të bërë një marrëveshje.

Negociatat do të fillojnë sot me Britaninë, Francën dhe Gjermaninë, të cilat pritet të ulen me ministrin e jashtëm të Iranit në Gjenevë.

Ndërkohë, Sekretarja e shtypit e Shtëpisë së Bardhë, Karoline Leavitt, lexoi një deklaratë nga zoti Trump që thoshte: “Bazuar në faktin se ekziston një shans i konsiderueshëm për negociata që mund të zhvillohen ose jo me Iranin në të ardhmen e afërt, unë do të marr vendimin tim nëse do të shkoj apo jo brenda dy javëve të ardhshme”.

Zhvillimet erdhën në një ditë tjetër tmerri, ndërsa një raketë balistike iraniane goditi Spitalin Soroka, në Beersheba, i cili pësoi dëme të mëdha.

Sulmi, një goditje e drejtpërdrejtë, la 71 të plagosur dhe kryeministri Benjamin Netanyahu u zotua për hakmarrje.

Goditja e spitalit kërcënoi ta çonte Lindjen e Mesme në një luftë të plotë, ndërsa ministri i mbrojtjes i Izraelit, Israel Katz, tha se Ajatollah Ali Khamenei, Udhëheqësi Suprem i Iranit, “nuk mund të lejohet më të ekzistojë”, duke e quajtur atë “Hitleri modern”.

Netanyahu gjithashtu refuzoi të përjashtonte një përpjekje për vrasje të Khameneit.

Ndryshe, sipas raportimeve, SHBA-të më parë kanë vënë veton në dy atentate ndaj jetës së Khameneit. /Telegrafi/