Kosova përkrah SHBA-të ndaj Iranit, Kurti: Bota ka nevojë për më pak bomba bërthamore

Kryeministri në detyrë i Kosovës, Albin Kurti, ka reaguar pas zhvillimeve ndërkombëtare që lidhen me programin bërthamor të Iranit, duke e cilësuar rritjen e armatimit nuklear si kërcënim serioz për sigurinë globale.

“Siguria ndërkombëtare ka nevojë për më pak armatim nuklear dhe jo më shumë bomba bërthamore që vënë në rrezik gjithë njerëzimin,” ka deklaruar Kurti përmes një postimi në rrjetet sociale.

Ai ka shprehur shqetësimin e tij veçanërisht për vendet autoritare që, sipas tij, po zhvillojnë programe për t’u pajisur me armë të shkatërrimit në masë.

Lexo po ashtu Gjithçka që po ndodh në sulmet e Izraelit ndaj Iranit

“Posaçërisht kur shtete autoritare zhvillojnë programe për pajisje me armatim nuklear, kjo çështje bëhet urgjente dhe alarmuese”, shkroi Kurti.

Kurti tha se Republika e Kosovës qëndron përkrah qëndrimeve të Shteteve të Bashkuara të Amerikës dhe Bashkimit Evropian lidhur me kërcënimin që paraqet programi bërthamor i Iranit.

“Republika e Kosovës përkrah qëndrimin e SHBA-ve dhe të Bashkimit Evropian rreth programit të Iranit për t’u pajisur me armë nukleare”, tha kryeministri në detyrë.

Ai shtoi se SHBA-të janë aleati ynë kryesor, partneri i pazëvendësueshëm dhe miku special.

“Republika e Kosovës është e përcaktuar fuqishëm në mbrojtje të vlerave demokratike dhe euro-atlantike. SHBA-të janë superfuqia demokratike që duhen mbështetur.”, u shpreh Kurti. /Telegrafi/