Qeveria merr vendim, rriten shtesat për lehonat

Qeveria e Kosovës ka marr vendim që të rriten shtesat për lehonat.

Kryeministri në detyrë, Albin Kurti në mbledhjen e Qeverisë së Kosovës tha se vlera mujore e shtesave për lehonat që janë të papuna për gjashtë muaj do të jetë nga 170 në 325.9 euro.

Ndërsa, për nënat e punësuara, përveç pagesës prej 70 për qind të pagës së tyre për gjashtë muaj nga punëdhënësi, do të përfitojnë mbështetje edhe për tre muajt e tjerë me 319.5 euro në muaj.

Lexo po ashtu Rritja e shtesave për lehonat, Murati jep detajet nga vendimi që hyn në fuqi këtë muaj

“Sot, në mbledhjen e 261-të të Qeverisë, do të miratojmë rritjen e vlerës mujore të shtesave nga 170 euro në 325.9 euro – aq sa është vlera neto e pagës minimale të re. Pra, për të gjitha nënat lehona, që nga ky muaj, shtesa mujore do të rritet në 325.9 euro. Kjo përbën një rritje prej 91.7%, apo gati dyfishim të shtesave.

Për gjashtë muaj, shtesa e rritur përkthehet në 1,955.4 euro, dhe kur kësaj i shtojmë edhe shtesën mujore për fëmijën, që është së paku 20 euro në muaj, apo 120 euro për gjashtë muajt e parë, atëherë efektivisht del se Qeveria mbështet secilën nënë të re me 2,075.4 euro”, tha ai.

Sipas tij, për çdo fëmijë të lindur, mbështetja e Qeverisë vetëm për gjashtë muajt e parë e tejkalon vlerën prej 2 mijë eurosh.

“Krahas kësaj, ne sot do të miratojmë pagën mesatare referuese, e cila shërben për përllogaritjen e pagesës për tre muaj në nivelin 50% të pagës mesatare – që është obligim i Qeverisë për secilën lehonë të punësuar.

Pra, përveç pagesës prej 70% për gjashtë muaj nga punëdhënësi, lehonat e punësuara do të përfitojnë mbështetje për tre muajt të tjerë nga Qeveria në vlerën prej 319.5 euro – që është 50% e pagës mesatare. Krahasuar me nivelin aktual prej 223 euro, mbështetja e re paraqet një rritje prej 43.3%.

Thënë ndryshe, secila lehonë e punësuar, përveç pagesës nga punëdhënësi, do të ketë tre muaj pagesë të pushimit të lehonisë nga Qeveria në vlerë prej 319.5 euro në muaj, si dhe – në kuadër të skemës së shtesave për lehona – edhe tre muaj të tjerë nga 325.9 euro në muaj. Kur kësaj i shtohen edhe shtesat mujore për fëmijë, rezulton se edhe lehonat e punësuara do të përfitojnë mbështetje mbi 2 mijë euro nga Qeveria, qysh në nëntë muajt e parë pas lindjes, përveç pagesës që marrin nga punëdhënësi, që është 70% e pagës për gjashtë muaj”, tha ai.

Sipas Kurtit, për të gjitha nënat lehona shtesat do të rriten që nga ky muaj. /Telegrafi/